LHEE ILEUMEE
Assalamualaikom wahai e tuan
Lon pu phon Nazam ngen kalam Allah
Lhee boh ileumee beu ta Turi
Bek sampee akhi meu raba raba
Ilmu syariat peget but tuboh
Yang brok brok bek roh lam amai gata
Bekna but zaleem dan hareum bek roh
Bek ta pajoh yang riba riba
Ta pubut suroh peu jioh teugah
Yang Sunnah Sunnah beu lee ta kerja
Peupah syahadat peupah sembahyang
Peupah Shiam, zakeut pih beuna
Ilmu Tarikat peuget but hatee
Beugleeh sabee bek na Riya
Bekna ujob, bekna teukabo
Bek deuh but dro ceudah that rupa
Beuna ta tobat bak but yang salah
Beuna Haraqah Qur'an tabaca
Beu hadir hatee lam but ibadah
Ziker ta tamah lam tiep-tiep masa
Ileumee Hakikat Peugeot but Roh
Jiwa lam tuboh beuget ta jaga
Roh lam tuboh hana tom matee
Bak Rabbul jaleel ta gisa gata
Roh yang jroh ka geu Turi Allah
Lam Muraqabah Geujaga Sabee
Nyo ka Geujaga jeut Musyahadah
Ta Turi Allah bak Mahluk lahee
Nyo bak Mahluk ka deuh Takalen Allah
Ka Meumakrifah gata eu akhi
Taturi Nan taturi sifeut
Taturi but zat yang adee
Nyo Nazam beu ta puphom
Nyo ken panton nyo ken sastra
Nyo nasehat wahee we ampon
Bak Allah Rabbon ta harap Redha
Jeuram 04.08, Sabtu,04 Desember 2021.
SYARAH HIKAM
Assalamualaikum ta pujo Allah
Keu Ibnu attailah haba meu punca
Ulon yang Faqir meuruno surah
Kitab Ibnu attailah Hikan bab pertama
Min a'lamati i'timadi a'lal Amal
Nyo tanda ureung keureja harap bak amai
Panee na breuh nyo tan padee
Panee na hasee nyo tan keureja
Panee na puleh nyo tan meu ubat
Panee na sehat nyo tan useuha
Meunan geu peugah Lee ureung jahee
Geu anggap hasee hasil keureuja
Na yang Tan puleeh lheuh geu meu ubat
Na yang tan syufa'at lheuh geu keureja
Na yang Tan careng lheuh gue meuruno
Na yang Tan meuho lheuh geu meubaca
Meunan keuh lazeem wahee e Ado
Nibak geutanyo Dum rata rata
Hana Geupuwoo ni bak Allah
Hana Geu seurah bak po rabbana
Nuqshanurraja i I'nda wujudizzalal
Kureung that harap nibak Tuhan
Geu pikee gob nyan na kuasa hamba
Geu pikee raseuki na bak insan
Ata bandum nyan bak Allah punca
Keudeh bak Allah mandum ta puwo
Bek sampe ado but sia sia
Bek sampe amai harap imbalan
Bek sampee sembahyang harap syuruga
Bek sembahyang mengharap upah
Bek seudeukah harap pahala
Yang ta harap Reza bak Allah
Bek ibadah takot nuraka
Menan Geu surah Le Noval Fuadi
Faqir eee akhi di Nagan Raya
Tanda tanda mumat bak amalan
Kureung Ureung nyan harap bak po Rabbana.
Bek ta harap bak mahkluk Tuhan
Ban mandum nyan akan fana
Yang manteng harap bak mahkluk Tuhan
Tanda ilmee Tan meuruno Hana.
CIRI ZUHUD
Ya ilahon malikon makbud
Ciri Zuhud ulon ci Rika
Ureung Tan sedeh oh watee susah
Ureung Tan gundah oh watee papa
Hana teukliek oh geumadoh
Hana mehmoh oh watee bala
Hana Deuh seunang oh wate untong
Hana mbong watee juara
Hana Deuh seunang watee dipujo
Hana Deuh lalo watee bahagia
Hana teu ikat dengon materi
Hana Deuh banggi nibak but deca
Hana kayeem Deuh dalam kawan Lee
Hana Deuh tahee watee lam duka
Hana meusebab ngen mahluk Tuhan
Sebab mandumnyan bak Allah punca.
Hana Lee Riya lam but ibadah
Hana Lee susah oh Allah Bri bala
Geu beh gamba donya dalam hatee
Ka teu ingat sabee keu Po Rabbana
Ka Geujaga Dro bek roh lam maksiet
Bek roh Geumariet yang Hana guna
But yang Hareum Geujaga Bek Roh
But yang Makruh Geu Jaga Bekna
But Yang Subhat Geujaga Sabee
Geu Jaga Hatee Bek lee na Riya
Bek na ujob bek na teukabo
Geu jaga Dro bek roh lam Desya
Nyo ka Wara' wahe eee Ado
Ta jaga dro lam tiep tiep masa
Tajaga but jaga makanan
Ta jaga pakaean yang Allah Redha.
Nyoka Lheuh Wara' wahee ee Ayah
Ka Mujahadah maqam di Hamba
Mujahadah Ta lawan nafsu
Geutayo dirayu dalam but Desya
Dipeudeuh indah but mahluk Tuhan
Dipeudeuh nyoban bandum but gata
Dipeudeuh kuasa nibak Insan
Dipeudeuh kemampuan bak manusia
Keureuja Nafsu dibantu Syaitan
Dijok gambaran indah that Donya
Padahai akherat lebeh menawan
Dan lebeh keukai si umu masaa.
